I-click bisag asa aron moabli
  • III. ANG PAG-ILA SA DIOS SUMALA SA PAGTULON-AN SA SIMBAHAN
    UNANG BAHIN:
    ANG PAGPAMATOOD SA PAGTOO

    UNANG SEKSYON:
    “NAGATOO AKO” — “NAGATOO KAMI”

    KAPITULO I:
    ANG KATAKOS SA TAWO ALANG SA DIOS


    III. ANG PAG-ILA SA DIOS SUMALA SA
    PAGTULON-AN SA SIMBAHAN

    36 “Ang atong balaan nga inahan, ang Simbahan, naghupot ug nagtudlo nga ang Dios, nga mao ang unang prinsipyo ug kataposang tumong sa tanang butang, mahimong mailhan uban ang kasigurohan pinaagi sa binuhat nga kalibotan, diha sa dan-ag sa tawhanong katarungan.”[11] Kon wala kini nga katakos, dili makahimo ang tawo sa pagdawat sa pagpadayag sa Dios. Kini nga katakos anaa sa tawo tungod kay siya gilalang “diha sa larawan sa Dios.”[12]

    37 Apan diha sa historikal nga mga kahimtang diin makita sa tawo ang iyang kaugalingon, makasinati siya og daghang mga kalisdanan sa pag-ila sa Dios pinaagi lamang sa dan-ag sa katarungan:
    “Bisan tood, sa tukmang pagkasulti, ang tawhanong katarungan tinuod gayod nga makahimo, pinaagi sa iyang kaugalingong natural nga gahum ug kahayag, sa pagkab-ot sa tinuod ug sigurado nga kahibalo mahitungod sa usa ka personal nga Dios, nga pinaagi sa Iyang providensya nagbantay ug nagdumala sa kalibotan, ug mahitungod sa natural nga balaod nga gisulat sa atong mga kasingkasing sa Magbubuhat; bisan pa niana, adunay daghang mga babag nga makapugong sa katarungan sa epektibo ug mabungahong paggamit niining iyang kinaiyanhong katakos.” “Kay ang mga kamatooran nga may kalabotan sa relasyon tali sa Dios ug sa tawo hingpit nga molapas sa makita nga han-ay sa mga butang; ug kon kini hubaron ngadto sa buhat sa tawo ug makaimpluwensya sa iyang kinabuhi, nagkinahanglan kini og pagbiya sa kaugalingon ug pagsalikway sa kaugalingong interes.” “Ang tawhanong hunahuna, sa iyang bahin, mapugngan sa pagkab-ot niining mga kamatoorana, dili lamang tungod sa impluwensya sa mga igbalati ug sa imahinasyon, kondili usab tungod sa mga dili hapsay nga mga tinguha nga maoy mga sangpotanan sa orihinal nga sala.” “Busa mahitabo nga, niining mga butanga, dali ra nga kombinsihon sa mga tawo ang ilang kaugalingon nga ang usa ka butang nga dili nila gusto nga mahimong tinuod, bakak o labing menos kadudahan.”[13]
    38 Mao kini ang hinungdan nganong ang tawo nagkinahanglan nga malamdagan pinaagi sa pagpadayag sa Dios, dili lamang mahitungod sa mga butang nga molapas sa iyang pagsabot, kondili usab “mahitungod niadtong relihiyoso ug moral nga mga kamatooran nga sa ilang kaugalingon dili molapas sa kapasidad sa tawhanong katarungan, aron bisan diha sa kasamtangang kahimtang sa tawhanong kaliwatan, kini mahimong mailhan sa tanang tawo sa sayon nga paagi, uban ang lig-on nga kasigurohan, ug walay sagol nga kasaypanan.”[14]

    [11] Unang Konseho sa Vaticano, Dei Filius 2: DS 3004; itandi ang DS 3026; Ikaduhang Konseho sa Vaticano, Dei Verbum 6.
    [12] Itandi ang Genesis 1:27.
    [13] Papa Pio XII, Humani generis 561: DS 3875.
    [14] Papa Pio XII, Humani generis 561: DS 3876; itandi ang Dei Filius 2: DS 3005; Dei Verbum 6; San Tomas Aquinas, Summa Theologiae I, 1, 1.

0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.