Si Cain ug si Abel
1 Niipon ang tawo sa iyang asawa nga si Eva, ug nagmabdos siya ug nanganak kay Cain. Miingon siya, "Nakahimo ako ug usa ka lalaking bata sa tabang sa GINOO."
2 Sunod nanganak siya sa iyang igsoon nga si Abel. Si Abel nahimong magbalantay sa mga kahayopan, ug si Cain nahimong mag-uuma sa yuta.
3 Sa paglabay sa panahon, nagdala si Cain ug halad alang sa GINOO gikan sa abot sa yuta,
4 apan si Abel, sa iyang bahin, nagdala sa tambok nga bahin gikan sa mga unang anak sa iyang kahayopan. Nahimuot ang GINOO kay Abel ug sa iyang halad,
5 apan wala siya nahimuot kay Cain ug sa iyang halad. Busa nasuko pag-ayo si Cain ug nagsubo ang iyang nawong.
6 Unya miingon ang GINOO kay Cain: "Ngano nga nasuko ka man? Ngano nga nagsubo man ang imong nawong?
7 Kon magbuhat ka sa maayo, dili ba dawaton man ka? Apan kon dili, ang sala nag-atang sa pultahan: ang pangandoy niini maanaa kanimo, apan kinahanglan nga magmando ka niini."
8 Miingon si Cain sa iyang igsoon nga si Abel, "Uban ta sa kaumahan." Sa dihang didto na sila sa kaumahan, gihasol ni Cain ang iyang igsoon nga si Abel ug gipatay niya kini.
9 Unya nangutana ang GINOO kay Cain, "Hain man ang imong igsoon nga si Abel?" Mitubag siya, "Wala ako mahibalo. Ako ba ang magbalantay sa akong igsoon?"
10 Miingon ang Dios: "Unsa ba kining imong gihimo? Ang dugo sa imong igsoon nagtuaw kanako gikan sa yuta!
11 Karon tinunglo ka gikan sa yuta nga miabli sa baba niini aron pagdawat sa dugo sa imong igsoon gikan sa imong kamot.
12 Kon mag-uma ka sa yuta, dili na kini mohatag kanimo sa abot niini. Mahimo kang usa ka maglatagaw ug maglaag-laag sa yuta."
13 Miingon si Cain sa GINOO: "Ang akong silot dako ra kaayo aron antuson.
14 Tan-awa, gipahawa mo ako karon gikan sa yuta. Kinahanglan nga magtago ako gikan sa imong presensya ug mahimong usa ka maglatagaw sa yuta. Bisan kinsa nga makakita nako makapatay kanako."
15 Apan miingon ang GINOO kaniya: "Dili ingon niana! Kon kinsa man ang mopatay kay Cain, pabalosan kini ug kapito ka pilo." Busa gibutangan sa GINOO ug timaan si Cain, aron walay makakita kaniya nga mopatay kaniya.
16 Unya mibiya si Cain gikan sa presensya sa GINOO ug mipuyo sa yuta sa Nod, sa silangan sa Eden.
Ang mga Kaliwat ni Cain ug ni Seth
17 Niipon si Cain sa iyang asawa, ug nagmabdos siya ug nanganak kay Enoc. Nahimo usab si Cain nga tagtukod sa usa ka siyudad, ug gipangalanan niya kini subay sa ngalan sa iyang anak nga si Enoc.
18 Natawo kay Enoc si Irad, ug si Irad nahimong amahan ni Mehujael; si Mehujael nahimong amahan ni Metusael, ug si Metusael nahimong amahan ni Lamec.
19 Nangasawa si Lamec ug duha ka babaye; ang ngalan sa una mao si Ada, ug ang ngalan sa ikaduba mao si Zila.
20 Nanganak si Ada kay Jabal, nga nahimong katigulangan sa mga nagpuyo sa mga tolda ug nag-atiman sa mga kahayopan.
21 Ang ngalan sa iyang igsoon mao si Jubal, nga nahimong katigulangan sa tanang nagpatugtog sa arpa ug sa plawta.
22 Si Zila, sa iyang bahin, nanganak kay Tubalcain, ang katigulangan sa tanang naghimo ug mga kasangkapan gikan sa bronsi ug puthaw. Ang igsoong babaye ni Tubalcain mao si Naama.
23 Miingon si Lamec sa iyang mga asawa:
"Ada ug Zila, paminawa ang akong tingog;
mga asawa ni Lamec, paminawa ang akong gipamulong:
Napatay ko ang usa ka tawo tungod sa pagsamad kanako,
usa ka batan-ong lalaki tungod sa pagbun-og kanako.
24 Kon pabalosan si Cain ug kapito ka pilo,
nan si Lamec kapitoan ug pito ka pilo."
25 Niipon pag-usab si Adan sa iyang asawa, ug nanganak kini ug usa ka lalaki nga iyang gipangalanag Seth. "Gihatagan ako sa Dios ug laing kaliwat puli kay Abel," miingon siya, "kay gipatay man siya ni Cain."
26 Ngadto kay Seth, natawo usab ang usa ka anak nga lalaki, ug gipangalanan niya kini nga Enos.
Niadtong panahona nagsugod ang mga tawo sa pagtawag sa ngalan sa GINOO.
0 comments: