I-click bisan asa aron mobukas
  • GENESIS Kapitulo 3

     

    Ang Pagpahawa Gikan sa Eden


    1 Karon ang bitin mao ang labing maalamon sa tanang ihalas nga mananap nga gihimo sa GINOOng Dios. Nangutana siya sa babaye, "Miingon ba gayod ang Dios, 'Dili kamo mokaon gikan sa bisan unsang kahoy sa tanaman'?"


    2 Mitubag ang babaye sa bitin: "Makaon namo ang bunga sa mga kahoy sa tanaman;


    3 apan bahin ra sa bunga sa kahoy nga anaa sa tunga sa tanaman nga miingon ang Dios, 'Dili kamo mokaon niini o bisan gani motandog niini, kay kon motandog kamo, mamatay kamo.'"


    4 Apan miingon ang bitin sa babaye: "Dili man gayod kamo mamatay!


    5 Nasayod pag-ayo ang Dios nga sa adlaw nga mokaon kamo niini, mabukhad ang inyong mga mata ug mahimo kamo nga ingon sa Dios, nga makahibalo sa maayo ug sa daotan."


    6 Nakita sa babaye nga ang kahoy maayo diay nga kan-on ug makapahimuot sa mga mata, ug ang kahoy maayong panguhaon aron makaangkon ug kaalam. Busa mikuha siya sa bunga niini ug mikaon; ug gihatagan usab niya ang iyang bana nga uban kaniya, ug mikaon siya.


    7 Unya nabukhad ang mga mata nilang duha, ug nasayran nila nga silang duha mga hubo; busa nagtahi sila ug mga dahon sa higera ug naghimo ug mga tapag-atbang alang sa ilang kaugalingon.


    8 Sa dihang nadungog nila ang tingog sa GINOOng Dios nga naglakaw-lakaw sa tanaman sa panahon nga mibuyuhot ang bugnaw nga hangin sa adlaw, ang tawo ug ang iyang asawa nagtago gikan sa presensya sa GINOOng Dios taliwala sa mga kahoy sa tanaman.


    9 Unya gitawag sa GINOOng Dios ang tawo ug nangutana kaniya: "Hain ka man?"


    10 Mitubag siya, "Nadungog ko ikaw sa tanaman; apan nahadlok ako tungod kay hubo man ako, busa nagtago ako."


    11 Unya nangutana ang Dios: "Kinsay nagsulti kanimo nga hubo ka? Nakaon ba ka sa kahoy nga akong gidili kanimo nga kahanan?"


    12 Mitubag ang tawo, "Ang babaye nga imong gibutang diri uban nako—siya ang naghatag kanako sa bunga sa kahoy, busa mikaon ako."


    13 Unya nangutana ang GINOOng Dios sa babaye: "Unsa ba kining imong gihimo?" Mitubag ang babaye, "Gilimbongan ako sa bitin, busa mikaon ako."


    14 Unya miingon ang GINOOng Dios sa bitin:

    "Tungod kay gihimo mo kini,

    tinunglo ka

    labaw sa tanang mga mananap, binuhi man o ihalas;

    Sa imong tiyan magkamang ka,

    ug abog ang imong kan-on

    sa tanang adlaw sa imong kinabuhi.


    15 Ibutang ko ang panag-away sa tunga nimo ug sa babaye,

    ug sa tunga sa imong kaliwat ug sa iyang kaliwat;

    Pukpukon nila ang imong ulo,

    samtang magpamaak ka sa ilang tikod."


    16 Ngadto sa babaye miingon siya:

    "Pahuwaiton ko pag-ayo ang imong kabudlay sa pagmabdos;

    pinaagi sa kasakit mag-anak ka.

    Apan ang imong pangandoy maanaa sa imong bana,

    ug siya magmando kanimo."


    17 Ngadto sa tawo miingon siya: "Tungod kay gipamatian mo ang imong asawa ug mikaon ka sa kahoy nga akong gisugo kanimo, 'Dili ka mokaon niini,'

    Tinunglo ang yuta tungod kanimo!

    Pinaagi sa kabudlay mokaon ka sa abot niini

    sa tanang adlaw sa imong kinabuhi.


    18 Mga tunok ug mga sampinit ang itubo niini alang kanimo,

    ug mokaon ka sa balili sa kaumahan.


    19 Pinaagi sa singot sa imong agtang

    mokaon ka ug tinapay,

    Hangtod nga mobalik ka sa yuta,

    diin ka gikuha;

    Kay abog ka man,

    ug sa abog ka usab mobalik."


    20 Gipangalanan sa tawo ang iyang asawa nga "Eva," tungod kay siya man ang inahan sa tanang buhi.


    21 Gihimoan sa GINOOng Dios ang tawo ug ang iyang asawa ug mga bisti gikan sa panit sa mananap, ug gisul-oban niya sila.


    22 Unya miingon ang GINOOng Dios: "Tan-awa! Ang tawo nahimo nang sama sa usa kanato, nga nakahibalo sa maayo ug sa daotan! Karon, basin kon itunol niya ang iyang kamot aron mokuha usab sa bunga sa kahoy sa kinabuhi, ug mokaon niini ug mabuhi sa hangtod?"


    23 Busa gipahawa siya sa GINOOng Dios gikan sa tanaman sa Eden, aron mag-atiman sa yuta diin siya gikuha.


    24 Gipahawa niya ang tawo, ug gibutang niya ang mga kerubin ug ang nagsiga nga espada nga nagtuyok sa silangan sa tanaman sa Eden, aron magbantay sa daan padulong sa kahoy sa kinabuhi.




0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.