I-click bisan asa aron mobukas
  • GENESIS Kapitulo 2



    1 Busa nahuman ang kalangitan ug ang yuta ug ang tanan nga anaa niini.


    2 Sa ikapito nga adlaw, nahuman sa Dios ang buhat nga iyang gihimo; ug mipahulay siya sa ikapito nga adlaw gikan sa tanan niyang buhat nga iyang gihimo.


    3 Gipanalanginan sa Dios ang ikapito nga adlaw ug gihimo kini nga balaan, tungod kay niining adlawa mipahulay siya gikan sa tanan niyang buhat sa paglalang.


    I. ANG SUGILANON SA MGA NASOD

    Ang Tanaman sa Eden


    4 Mao kini ang sugilanon sa kalangitan ug sa yuta sa dihang gihimo sila. Sa dihang ang GINOOng Dios naghimo sa yuta ug sa kalangitan—


    5 wala pa'y mga sapinit sa kaumahan sa yuta ug wala pa'y balili sa kaumahan nga nitubo, kay ang GINOOng Dios wala pa man nagpatupa ug ulan sa yuta ug wala pa'y tawo nga mag-atiman sa yuta,


    6 apan adunay tubig nga mitunga gikan sa yuta ug nagpatubig sa tibuok nawong sa yuta—


    7 unya giumol sa GINOOng Dios ang tawo gikan sa abog sa yuta ug gihuypan niya sa iyang mga ilong ang gininhawa sa kinabuhi, ug ang tawo nahimong usa ka buhing binuhat.


    8 Nagtanom ang GINOOng Dios ug usa ka tanaman sa Eden, didto sa silangan, ug didto iyang gibutang ang tawo nga iyang giumol.


    9 Gipatubo sa GINOOng Dios gikan sa yuta ang matag kahoy nga makapahimuot tan-awon ug maayo nga kan-on, diha usab ang kahoy sa kinabuhi sa tunga sa tanaman ug ang kahoy sa kahibalo sa maayo ug sa daotan.


    10 Adunay usa ka suba nga nagagikan sa Eden aron magpatubig sa tanaman; gikan didto nabahin kini ug nahimong upat ka sanga.


    11 Ang ngalan sa una mao ang Pishon; kini ang nagtuyok sa tibuok yuta sa Havilah, diin anaa ang bulawan.


    12 Ug ang bulawan sa maong yuta maayo; anaa usab didto ang bdellium ug ang lapis lazuli.


    13 Ang ngalan sa ikaduhang suba mao ang Gihon; kini ang nagtuyok sa tibuok yuta sa Cush.


    14 Ang ngalan sa ikatulo nga suba mao ang Tigris; kini ang nag-agay sa silangan sa Asshur. Ug ang ikaupat nga suba mao ang Euphrates.


    15 Gihaon sa GINOOng Dios ang tawo ug gibutang siya sa tanaman sa Eden, aron mag-atiman ug magbantay niini.


    16 Ug gipasidan-an sa GINOOng Dios ang tawo sa pag-ingon: "Makaon mo ang tanang bunga sa mga kahoy sa tanaman,


    17 apan ang kahoy sa kahibalo sa maayo ug sa daotan dili mo gayod kainan; kay sa adlaw nga mokaon ka gikan niini, siguradong mamatay ka."


    18 Unya miingon ang GINOOng Dios: "Dili maayo nga ang tawo mag-inusara. Maghimo ako ug usa ka kapares nga mohaom ug makatabang kaniya."


    19 Busa giumol sa GINOOng Dios gikan sa yuta ang tanang ihalas nga mananap ug ang tanang langgam sa kalangitan, ug gidala niya sila ngadto sa tawo aron tan-awon kon unsaon niya pagngalan sila; ug kon unsa ang gipangalan sa tawo sa matag buhi nga binuhat, mao kana ang nahimong ngalan niini.


    20 Naghatag ug ngalan ang tawo sa tanang binuhing mananap, sa mga langgam sa kalangitan, ug sa tanang ihalas nga mananap; apan alang sa tawo, wala gayoy nakit-an nga kapares nga makatabang kaniya.


    21 Busa gipahagbong sa GINOOng Dios ang usa ka maayong katulogon sa tawo, ug samtang natulog siya, gikuha niya ang usa sa iyang mga gusok ug gitakpan sa unod ang dapit niini.


    22 Unya gihimo sa GINOOng Dios ang gusok nga iyang gikuha gikan sa tawo nga usa ka babaye. Ug gidala niya siya ngadto sa tawo,


    23 ug miingon ang tawo:

    "Kini na gayod, sa kataposan, ang bukog sa akong mga bukog

    ug unod sa akong unod;

    pagatawgon kini nga 'babaye,'

    kay gikuha man kini gikan sa lalaki."


    24 Busa biyaan sa lalaki ang iyang amahan ug iyang inahan ug moipon siya sa iyang asawa, ug silang duha mahimong usa ka lawas.


    25 Silang duha, ang tawo ug ang iyang asawa, pulos mga hubo, apan wala sila batiag kaulaw.





0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.