I-click bisan asa aron mobukas
  • STA. MARIA, GIPASAKA SA LANGIT (ASSUMPTION OF MARY)
    PANUDLO SA SANTA IGLESIA

    Ang Simbahang Katolika nagtudlo nga ang Mahal nga Birhen Maria, human mahuman ang iyang kinabuhing yutan-on, gidala sa Dios ngadto sa langit uban sa iyang lawas ug kalag. Kini gitawag nga Assumption of Mary.

    Ang Assumption dili sama sa Ascension ni Jesucristo. Si Jesucristo misaka sa langit pinaagi sa iyang kaugalingong gahum isip Dios, samtang si Maria gidala ngadto sa langit pinaagi sa gahum sa Dios.

    Kini nga dogma opisyal nga gipahayag ni Papa Pio XII pinaagi sa Apostolic Constitution Munificentissimus Deus niadtong Nobyembre 1, 1950.


    MGA PAGSUPAK

    1 Pagsupak
    "Walay usa nga misaka sa langit gawas sa Anak sa Tawo nga mikanaog gikan sa langit." Juan 3:13
    Kon si Jesus lamang ang misaka sa langit, nan imposible nga si Maria gidala ngadto sa langit.

    2 Pagsupak
    "Kay ang suhol sa sala mao ang kamatayon." Roma 6:23
    Kon si Maria namatay sama sa tanang tawo, nganong lahi man ang nahitabo kaniya?

    3 Pagsupak
    Sa 2 Timoteo 3:16–17 Igo na ang Kasulatan aron mahitsas ug mahingpit ang tawo. 
    Kon walay bersikulo nga giingon sa Kasulatan nga gidala si Maria ngadto sa langit, unsa pa may rason nga toohan kini?

    4 Pagsupak
    "Ug mitungha ang usa ka dakong ilhanan sa langit: usa ka babaye nga gisul-oban sa adlaw..." Pinadayag 12:1. Ang babaye sa Pinadayag 12 mao ang Israel o ang Simbahan, dili si Maria.


    KINATIBUK-ANG TUBAG

    Ang kasaypanan sa kadaghanang pagsupak mao ang paghunahuna nga ang usa ka pagtulun-an kinahanglan adunay usa ka bersikulo nga diretsong nagaingon niini aron mahimong tinood.

    Apan ang Bibliya mismo nagpakita nga adunay mga kamatooran nga wala gisulat sa hingpit apan gipasa pinaagi sa tradisyon ug sa buhing pagtulun-an sa mga Apostoles (2 Tesalonica 2:15).

    Ang Assumption ni Maria dili supak sa Bibliya. Hinuon, nahiuyon kini sa daghang prinsipyo sa Balaang Kasulatan ug sa dugay nang pagtuo sa Simbahan.


    MGA TUBAG SA MGA PAGSUPAK

    Tubag sa 1 Pagsupak
    Juan 3:13
    Kini nga bersikulo wala maghisgot kang Maria. Ang konteksto niini mao ang pagpahayag ni Jesus nga Siya lamang ang mikanaog gikan sa langit ug adunay hingpit nga kahibalo sa Amahan. Apan ang Bibliya usab nagaingon: "Si Enoc naglakaw uban sa Dios; unya wala na siya makita kay gikuha man siya sa Dios." Genesis 5:24. "Si Elias mitungas ngadto sa langit pinaagi sa usa ka alimpulos." 2 Hari 2:11. Ug gipamatud-an pa kini sa Hebreo 11: "Pinaagi sa pagtoo si Enoc gibalhin aron dili makatilaw sa kamatayon." Hebreo 11:5

    Nia ang Husay
    Kon ang Dios nakadala kang Enoc ug Elias pinaagi sa Iyang gahom, wala'y hinungdan nga moingon nga dili usab mahimo kini sa Mahal nga Birhen Maria. Ang Juan 3:13 wala maghisgot nga walay laing tawo nga mahimong dad-on sa Dios ngadto sa langit. Ang iyang punto mao nga si Jesus lamang ang mikanaog gikan sa langit ug adunay hingpit nga kahibalo sa Amahan.

    Tubag sa 2 Pagsupak
    Roma 6:23
    Tinood nga ang tanang tawo moatubang sa kamatayon. Apan ang Assumption wala magtudlo nga wala namatay si Maria. Ang dogma nag-ingon lamang: "...human mahuman ang dagan sa iyang kinabuhing yutan-on..." Wala kini maghukom kon namatay ba siya o wala sa wala pa ang Assumption. Busa dili supak ang Assumption sa Roma 6:23.

    Nia ang Husay
    Ang sentro sa dogma mao ang pagdala sa Dios kang Maria ngadto sa langit uban sa iyang lawas ug kalag, dili ang paagi sa iyang pagbiya sa kalibotan.

    Tubag sa 3 Pagsupak
    2 Timoteo 3:16–17
    Ang Bibliya tinood nga Pulong sa Dios. Apan ang Bibliya usab nagaingon: "Busa, mga igsoon, barog nga malig-on ug kupti ang mga tradisyon nga inyong nakat-onan pinaagi sa among pulong o pinaagi sa among sulat." 2 Tesalonica 2:15. Dugang pa, "Daghan pa usab ang ubang mga butang nga gibuhat ni Jesus; kon isulat pa ang tanan..." Juan 21:25

    Nia ang Husay
    Dili tanan nga kamatooran gisulat sa Bibliya. Ang mga Apostoles adunay gisulat ug adunay gipasa pinaagi sa buhing Tradisyon.

    Tubag sa 4 Pagsupak
    Pinadayag 12:1
    Tinood nga ang "babaye" mahimong maglarawan sa Israel ug sa Simbahan. Apan wala kini nagpasabot nga dili usab kini mahimong nagtumong kang Maria. Ang Bibliya sagad mogamit ug daghang lebel sa simbolismo. Pananglitan: Ang Cordero sa Pinadayag mao si Cristo. Ang Cordero sa Exodo simbolo usab ni Cristo. Sa samang paagi, ang babaye sa Pinadayag mahimong naghulagway sa: Israel, Simbahan, ug sa Mahal nga Birhen Maria nga maoy nanganak sa Mesiyas (Pinadayag 12:5).

    Ania ang Husay
    Busa dili supak sa Bibliya ang paggamit sa Pinadayag 12 isip usa sa mga hulagway nga nahiuyon sa kadungganan nga gihatag sa Dios kang Maria.

    PANAPOS
    Ang Assumption ni Maria wala nagtudlo nga si Maria mahimong Dios o katumbas ni Cristo. Ang saktong ipasabot niini mao nga ang Dios, sa Iyang dakong grasya, nagpasidungog sa Inahan sa Manluluwas pinaagi sa pagdala kaniya ngadto sa langit uban sa iyang lawas ug kalag.

    Ang Bibliya wala mosupak niini. Hinoon, ang Bibliya nagpakita nga ang Dios makahimo sa pagdala sa Iyang mga alagad ngadto sa langit, ug nga dili tanan Niyang gibuhat gisulat sa Kasulatan.

    Ang Simbahang Katolika nagpabiling matinumanon niini nga pagtoo nga gipasa gikan sa mga Apostoles ug gipamatud-an sa dugay nang Tradisyon sa Simbahan.

    Mga Reperensya

    Balaang Kasulatan
    Genesis 5:24
    2 Hari 2:11
    Salmo 132:8
    Juan 3:13
    Juan 21:25
    2 Tesalonica 2:15
    Hebreo 11:5
    Pinadayag 12:1–5

    Mga Dokumento sa Simbahan
    Munificentissimus Deus (Papa Pius XII, 1950)
    Catechism of the Catholic Church, nos. 966–967



0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.