Ang Simbahang Katolika nagtudlo nga ang Mahal nga Birhen Maria tinuod nga Inahan sa Dios, nga sa Griyego gitawag og Theotokos — God-bearer o Inahan sa Dios. Wala kini nagpasabot nga si Maria mao ang gigikanan sa pagka-Dios ni Jesucristo. Ang Anak sa Dios walay sinugdanan ug walay kataposan. Siya walay kataposang Anak sa Amahan. Apan sa dihang ang Anak sa Dios nahimong tawo, Siya adunay tinuod nga pagkatawo gikan kang Maria. Busa, ang gipanganak ni Maria dili usa lamang ka ordinaryong tawo nga sa ulahi nahimong Dios. Ang iyang gipanganak mao ang walay kataposang Anak sa Dios nga nahimong tawo. Mao kini ang hinungdan nga gitawag si Maria nga Theotokos. Ang dogma dili lamang bahin kang Maria. Sa pagkatinuod, kini usa ka pagdepensa sa tinuod nga pagkatawo ni Jesucristo. Kung si Jesus usa lamang ka tawo, dili husto nga tawgon si Maria nga Inahan sa Dios. Apan kung si Jesus mao ang Dios nga nahimong tawo, nan ang pagtawag kang Maria nga Inahan sa Dios usa ka hustong pagsulti mahitungod sa Persona nga iyang gipanganak.
MGA PAGSUPAK
1 Pagsupak
"Ug nganong gitugotan man ako niini, nga ang inahan sa akong Ginoo moanhi kanako?" Lucas 1:43. Wala man nag-ingon ang Biblia nga Inahan sa Dios si Maria. Inahan lamang siya ni Jesus."
2 Pagsupak
"Sa sinugdan mao na ang Pulong, ug ang Pulong uban sa Dios, ug ang Pulong mao ang Dios." Juan 1:1. Kung ang Pulong mao ang Dios, dili mahimong inahan si Maria sa Dios kay ang Dios walay inahan."
3 Pagsupak
"Apan wala siya makighilawas kaniya hangtod nga nanganak siya ug anak nga lalaki..." Mateo 1:25. Si Maria inahan lamang sa tawhanong Jesus. Ang pagka-Dios ni Jesus gikan sa Amahan, busa dili siya Inahan sa Dios."
4 Pagsupak
"Kinsa man ang akong inahan? Ug kinsa man ang akong mga igsoon?" Mateo 12:48. Si Jesus mismo wala maghatag kang Maria ug espesyal nga lugar. Busa dili husto nga tawgon siya nga Inahan sa Dios."
5 Pagsupak
Dili ba kini mao ang panday, ang anak ni Maria..." Marcos 6:3. Gitawag siya nga anak ni Maria, dili Anak sa Dios nga si Maria maoy inahan. Busa ordinaryong inahan lamang si Maria."
KINATIBUK-ANG TUBAG
Ang unang butang nga kinahanglan atong sabton mao ang kalainan tali sa Persona ug kinaiya. Ang pangutana dili: "Si Maria ba maoy naghatag kang Jesus sa iyang pagka-Dios?" Ang tubag ana mao - dili. Kini ang hustong pangutana: "Kinsa ang gipanganak ni Maria?" Ang Biblia nagtudlo nga ang gipanganak ni Maria mao ang Anak sa Dios. "Busa ang Balaang Bata nga matawo pagatawgon nga Anak sa Dios." Lucas 1:35. Si San Pablo miingon:
"Apan sa dihang miabot ang kahingpitan sa panahon, gipadala sa Dios ang iyang Anak, nga natawo gikan sa usa ka babaye..." Galacia 4:4
Tan-awa ang duha ka kamatuoran: Ang Anak sa Dios gipadala sa Amahan, ug ang Anak sa Dios natawo gikan sa usa ka babaye. Kinsa ang babaye? Maria. Busa, ang Anak sa Dios nga walay kataposan nahimong tawo ug natawo gikan kang Maria. Mao nga ang Biblia mismo nagdala kanato ngadto sa titulo nga Theotokos.
MGA TUBAG SA MGA PAGSUPAK
Tubag sa 1 Pagsupak
"Ang inahan sa akong Ginoo." Lucas 1:43
Ang maong pulong gikan mismo kang Santa Isabel, nga gisultihan sa Espiritu Santo. Tan-awa ang konteksto: "Ug napuno si Isabel sa Espiritu Santo." Lucas 1:41. Ug dayon miingon siya: "Ug nganong gitugotan man ako niini, nga ang inahan sa akong Ginoo moanhi kanako?" Lucas 1:43. Karon, kinsa ang iyang gitawag nga Ginoo? Pipila lamang ka bersikulo sa wala pa niini, miingon ang anghel: "Siya mahimong dako ug pagatawgon nga Anak sa Labing Halangdon..." Lucas 1:32. Ug, "Ang Balaang Bata nga matawo pagatawgon nga Anak sa Dios." Lucas 1:35.
Niay husay, Si Maria mao ang inahan sa Bata nga mao ang Anak sa Dios. Si Isabel, nga napuno sa Espiritu Santo, mitawag kaniya nga: "Inahan sa akong Ginoo." Busa dili kini usa lamang ka ordinaryong titulo. Kini usa ka biblical nga pagpamatood kang Maria isip Inahan sa Ginoo.
Tubag sa 2 Pagsupak
"Ang Pulong mao ang Dios." Juan 1:1
Tinuod. Ug tan-awa ang sunod. "Ug ang Pulong nahimong unod ug mipuyo uban kanato." Juan 1:14. Kinsa ang Pulong? Ang Pulong mao ang Dios. Unsa may nahitabo sa Pulong? Nahimong unod. Kinsa ang iyang gigikanan sa iyang tawhanong pagkatawo? Tan-awa ang giingon sa anghel: "Ang Espiritu Santo mokunsad kanimo, ug ang gahom sa Labing Halangdon maglandong kanimo..." Lucas 1:35. Ug, "Busa ang Balaang Bata nga matawo..." Lucas 1:35.
Aniay husay,
Ang Juan 1:1 nag-ingon nga ang Pulong mao ang Dios.
Ang Juan 1:14 nag-ingon nga ang maong Pulong nahimong tawo.
Ang Lucas 1:35 nag-ingon nga ang Balaang Bata nga matawo kang Maria mao ang Anak sa Dios.
Demodo, dili duha ka Jesus ang atong hisgutan, usa ka tawo nga anak ni Maria; ug usa ka Dios nga Anak sa Amahan. Usa lamang ka Jesus ang atong hisgutan. Ang Pulong nga Dios nahimong tawo. Mao nga si Maria mahimong tawgon nga Inahan sa Dios, dili tungod kay siya ang gigikanan sa pagka-Dios sa Anak, kondili tungod kay ang iyang gipanganak mao ang Persona nga mao ang Dios nga nahimong tawo.
Tubag sa 3 Pagsupak
"Wala siya makighilawas kaniya hangtod nga nanganak siya..." Mateo 1:25
Ang bersikulo wala nagaingon: "Human sa pagkahimugso ni Jesus, nakighilawas na si Jose kang Maria." Ang gisulti lamang niini mao nga si Jose wala makighilawas kang Maria hangtod sa pagkahimugso ni Jesus. Apan ang pulong nga "hangtod" dili awtomatikong nagpasabot nga ang kahimtang nabag-o pagkahuman.
Pananglitan may giingon sa Biblia, "Kay siya kinahanglan maghari hangtod nga ibutang niya ang tanan niyang mga kaaway ilalom sa iyang mga tiil." 1 Corinto 15:25. Wala kini magpasabot nga mohunong si Cristo sa paghari pagkahuman sa tanan niyang mga kaaway nga mapildi.
Niay husay, ang Mateo 1:25 dili pamatood nga adunay laing mga anak si Maria. Ug labaw sa tanan, bisan pa gani kung hisgutan ang perpetual virginity ni Maria, dili gihapon kana makapawala sa pagka-Theotokos. Kay ang pangutana sa Theotokos mao: Kinsa ang gipanganak ni Maria? Ug ang tubag sa Biblia: Ang Anak sa Dios nga nahimong tawo.
Tubag sa 4 Pagsupak
"Kinsa man ang akong inahan?" Mateo 12:48
Ang uban naggamit niini aron ipaubos ang papel ni Maria. Apan tan-awa ang tubag ni Jesus:
"Bisan kinsa nga nagbuhat sa kabubut-on sa akong Amahan nga anaa sa langit mao ang akong igsoon, ug igsoon nga babaye, ug inahan." Mateo 12:50
Wala gisalikway ni Jesus si Maria. Hinuon, ang iyang pagtulun-an nagpakita nga ang tinood nga pagkasuod kang Cristo dili lamang tungod sa pisikal nga relasyon, kondili tungod usab sa pagtuman sa kabubut-on sa Dios. Ug kinsa man ang unang nag-ingon: "Ania ang ulipon sa Ginoo; mahitabo kanako sumala sa imong pulong." Lucas 1:38. Si Maria.
Niang husay, si Maria dili lamang inahan ni Jesus sa unod. Siya mao usab ang hingpit nga ehemplo sa tawo nga mituman sa kabubut-on sa Dios. Busa ang Mateo 12:48 dili pagsalikway kang Maria. Hinuon, ang konteksto nagpadayag nga ang tinuod nga pagkasuod kang Cristo naglakip sa pagtuman sa kabubut-on sa Amahan—usa ka butang nga makita nato kang Maria sa Lucas 1:38.
Tubag sa 5 Pagsupak
"Dili ba kini mao ang panday, ang anak ni Maria..." Marcos 6:3
Tinood nga gitawag si Jesus nga: "anak ni Maria." Apan dili kini pamatood batok sa pagka-Theotokos ni Maria. Sa laing bahin, kini mismo usa ka lig-on nga pamatood nga si Maria tinuod nga inahan ni Jesus sumala sa iyang pagkatawo. Ug kinsa man si Jesus? Tan-awa ang unang kapitulo sa Marcos:
"Ang sinugdanan sa Maayong Balita bahin kang Jesucristo, Anak sa Dios." Marcos 1:1
Busa ang Biblia nagtudlo sa duha ka kamatuoran: Jesus — Anak ni Maria. Ug: Jesus — Anak sa Dios.
Niay husay, dili kinahanglan nga pilion nato ang usa ug isalikway ang usa. Si Jesus tinuod nga Anak ni Maria sumala sa iyang pagkatawo. Si Jesus tinuod usab nga Anak sa Dios sumala sa iyang pagka-Dios. Ug dili kini duha ka persona. Ang maong kamatooran makita sa: "Ang Pulong mao ang Dios." Juan 1:1, ug: "Ang Pulong nahimong unod." Juan 1:14 Busa ang Anak sa Dios nga nahimong tawo mao usab ang Anak ni Maria.
ANG BIBLICAL NGA HUSAY
Atong tipunon ang mga bersikulo:
1. Si Jesus mao ang Pulong nga Dios. Juan 1:1
2. Ang Pulong nahimong tawo. Juan 1:14
3. Ang Anak sa Dios natawo gikan sa usa ka babaye. Galacia 4:4
4. Ang Balaang Bata nga natawo kang Maria mao ang Anak sa Dios. Lucas 1:35
5. Si Maria gitawag nga "Inahan sa akong Ginoo." Lucas 1:43
Busa ang Biblical nga pangatarungan mao kini:
Ang Pulong = Dios.
Ang Pulong = nahimong tawo.
Ang nahimong tawo = natawo gikan kang Maria.
Busa si Maria = inahan sa Persona nga mao ang Dios nga nahimong tawo.
Dili kini nagpasabot nga si Maria maoy naghimo sa Dios.
Dili usab kini nagpasabot nga si Maria naglungtad una pa sa Dios.
Ang pasabot mao lamang nga ang Persona nga iyang gipanganak mao ang Anak sa Dios nga nahimong tawo.
Mao kini ang kahulugan sa Theotokos.
PANAPOS
Ang titulo nga Theotokos — Inahan sa Dios dili pagpasobra sa pagpasidungog kang Maria. Kini usa ka biblical nga depensa sa pagka-Dios ni Jesucristo. Kung moingon kita nga si Maria inahan lamang sa "tawhanong bahin" ni Jesus apan dili Inahan sa Dios, mahimo kitang mahulog sa sayop nga pagbulag kang Jesus ngadto sa duha ka persona. Apan ang Biblia nagtudlo nga: "Ang Pulong mao ang Dios." Juan 1:1, Ug: "Ang Pulong nahimong unod." Juan 1:14. Ug ang maong Anak sa Dios: "natawo gikan sa usa ka babaye." Galacia 4:4 Mao nga ang pangutana dili: "Si Maria ba ang gigikanan sa pagka-Dios?" Dili. Ang pangutana mao: "Kinsa ang iyang gipanganak?" Ug ang tubag sa Biblia: Ang Anak sa Dios nga nahimong tawo. Busa husto ang pagtawag kang Maria: STA. MARIA, INAHAN SA DIOS — THEOTOKOS. Dili tungod kay siya ang gigikanan sa Dios, kondili tungod kay ang iyang Anak mao ang Dios nga nahimong tawo alang sa atong kaluwasan.
MGA REPERENSYA
Balaang Kasulatan
Juan 1:1–14
Lucas 1:26–43
Mateo 1:18–25
Mateo 12:46–50
Marcos 1:1
Marcos 6:3
Galacia 4:4
Filipos 2:6–11
Hebreo 1:1–3
Panudlo sa Simbahan
Catechism of the Catholic Church, 495
Catechism of the Catholic Church, 466
Catechism of the Catholic Church, 509
Council of Ephesus (431 AD)
Importanteng Prinsipyo Biblical
"Ang Pulong mao ang Dios."
— Juan 1:1
"Ang Pulong nahimong unod."
— Juan 1:14
"Natawo gikan sa usa ka babaye."
— Galacia 4:4
"Ang Inahan sa akong Ginoo."
— Lucas 1:43
0 comments: