I-click bisag asa aron moabli
  • VI. MAHINUNGDANONG MGA PAGPAHIANGAY
    23 Gipasiugda sa Katekismo ang pagpasabot ug paglatid sa doktrina. Ang tumong niini mao ang pagtabang sa pagpalalom sa pagsabot sa pagtoo.
    Niining paagiha, kini gitumong ngadto sa pagkahamtong sa maong pagtoo, sa pagpanggamot niini diha sa personal nga kinabuhi, ug sa pagpadayag niini pinaagi sa personal nga pamatasan.[17]

    24 Sa pagkahimo niini, kining Katekismo wala gituyo nga maghatag sa mga pagpahiangay sa mga pagpresentar sa doktrina ug sa mga pamaagi sa katekesis nga gikinahanglan tungod sa nagkalainlaing kultura, edad, kahamtong sa espirituhanong kinabuhi, ug kahimtang sosyal ug eklesiyastikal sa tanang mga tawo nga gitumong niini. Ang maong mga gikinahanglang pagpahiangay responsibilidad sa mga partikular nga katekismo, ug labi na gayod sa mga nagtudlo sa mga magtutuo:
    “Ang nagtudlo kinahanglan mahimong ‘tanan nga butang alang sa tanang tawo’ (1 Cor 9:22), aron madala ang tanan ngadto kang Cristo. … Labaw sa tanan, dili angay maghunahuna ang mga magtutudlo nga usa lamang ka matang sa kalag ang gitugyan ngadto kanila, ug busa mahimo nilang gamiton ang usa ra ka pamaagi sa pagtudlo ug pagporma sa tanang mga magtutuo diha sa tinuod nga pagkadiosnon! Kinahanglan nilang masabtan nga ang uban anaa kang Cristo sama sa bag-ong natawo nga mga bata, ang uban sama sa mga tin-edyer, ug ang uban usab sama sa mga hamtong nga hingpit nang makahimo sa paggamit sa ilang mga katakos. … Kadtong gitawag ngadto sa ministeryo sa pagpangwali kinahanglan mopahiangay sa ilang mga pulong ngadto sa kahamtong ug pagsabot sa ilang mga mamiminaw, samtang ilang gipasa ang pagtulon-an mahitungod sa mga misteryo sa pagtoo ug sa mga lagda sa moral nga pamatasan.”[18]

    LABAW SA TANAN — GUGMA (Pagkamanggihatagon)

    25 Aron tapuson kining Prologue, angay nga atong hinumdoman kining pastoral nga prinsipyo nga gipahayag sa Roman Catechism:
    “Ang tibuok kabalaka mahitungod sa doktrina ug sa pagtudlo niini kinahanglan itumong ngadto sa gugma nga dili gayod matapos. Bisan kon adunay usa ka butang nga gipresentar alang sa pagtoohan, alang sa paglaom, o alang sa pagbuhat, ang gugma sa atong Ginoo kinahanglan kanunay nga himoon nga maabot ug masabtan, aron ang matag usa makakita nga ang tanang mga buhat sa hingpit nga Kristohanong hiyas naggikan sa gugma ug walay laing tumong gawas sa pag-abot ngadto sa gugma.”[19]

    [17] Itandi ang Catechesi tradendae 20–22; 25.
    [18] Roman Catechism, Preface II; itandi ang 1 Cor 9:22; 1 Ped 2:2.
    [19] Roman Catechism, Preface 10; itandi ang 1 Cor 13:8.

0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.