I-click bisag asa aron moabli
  • IV. ESTRUKTURA NIINING KATEKISMO
    13 Ang plano niining Katekismo dinasig sa dakong tradisyon sa mga katekismo nga nagtukod sa katekesis ibabaw sa upat ka haligi:
    ang pagpamatuod sa pagtoo sa bunyag (ang Credo);
    ang mga sakramento sa     pagtoo ;
    ang kinabuhi sa     pagtoo (ang mga Sugo); ug
    ang pag-ampo sa magtutuo (ang Pag-ampo sa Ginoo).

    UNANG BAHIN: ANG PAGPAMATUOD SA PAGTOO

    14 Kadtong nahisakop kang Cristo pinaagi sa pagtoo ug Bunyag kinahanglan nga mopahayag sa ilang pagtoo sa bunyag atubangan sa mga tawo.[16]
    Busa, una sa tanan, ang Katekismo naglatid ug nagpasabot sa Rebelasyon, diin ang Dios nakigsulti sa tawo ug naghatag sa Iyang kaugalingon ngadto sa tawo, ug sa     pagtoo, diin ang tawo mitubag ngadto sa Dios (Seksyon Usa).
    Ang pagpamatuod sa     pagtoo nagtingub sa mga gasa nga gihatag sa Dios ngadto sa tawo: isip Magbubuhat sa tanang maayo; isip Manunubos; ug isip Magbabalaan.
    Gipalambo kini diha sa tulo ka mga kapitulo mahitungod sa atong     pagtoo sa bunyag diha sa usa ka Dios:
    ang Amahan nga makagagahum sa tanan, ang Magbubuhat;
    ang Iyang Anak nga si Jesu-Cristo, atong Ginoo ug Manluluwas; ug
    ang Espiritu Santo, ang Magbabalaan, diha sa Balaan nga Simbahan (Seksyon Duha).

    IKADUHANG BAHIN: ANG MGA SAKRAMENTO SA PAGTOO

    15 Ang ikaduhang bahin sa Katekismo nagpasabot kon sa unsang paagi ang kaluwasan sa Dios, nga hingpit nang natuman sa makausa ug alang sa tanan pinaagi kang Jesu-Cristo ug sa Espiritu Santo, gihimong anaa ug mapresentar diha sa mga balaang lihok sa liturhiya sa Simbahan (Seksyon Usa), ilabina diha sa pito ka mga sakramento (Seksyon Duha).

    IKATULONG BAHIN: ANG KINABUHI SA PAGTOO

    16 Ang ikatulong bahin sa Katekismo naghisgot sa kataposang tumong sa tawo, nga gilalang diha sa larawan sa Dios: ang kalipay nga walay kataposan (beatitude), ug ang mga paagi aron maabot kini—
    pinaagi sa hustong pamatasan nga gawasnong gipili, uban sa tabang sa balaod ug grasya sa Dios (Seksyon Usa);
    ug pinaagi sa pagkinabuhi nga nagtuman sa duha ka pilo nga sugo sa gugma, nga gipatin-aw pinaagi sa Napulo ka Sugo sa Dios (Seksyon Duha).

    IKAUPAT NGA BAHIN: ANG PAG-AMPO DIHA SA KINABUHI SA PAGTOO

    17 Ang kataposang bahin sa Katekismo naghisgot sa kahulugan ug kamahinungdanon sa pag-ampo diha sa kinabuhi sa mga magtutuo (Seksyon Usa).
    Gitapos kini pinaagi sa usa ka mubo nga pagpasabot mahitungod sa pito ka mga pangamuyo sa Pag-ampo sa Ginoo (Seksyon Duha).
    Kay tinuod gayod nga dinhi niini atong makita ang kinatibuk-an sa tanang maayong mga butang nga kinahanglan natong gilaoman, ug nga gitinguha sa atong Amahan sa langit nga ihatag kanato.

    [16] Itandi ang Mateo 10:32; Roma 10:9.

0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.