I-click bisag asa aron moabli
  • I. ANG KINABUHI SA TAWO — ARON MAILHAN UG MAHIGUGMA SA DIOS
    1 Ang Dios, nga walay kinutoban ang kahingpitan ug bulahan sa Iyang kaugalingon, diha sa usa ka laraw nga bug-os nga naggikan sa Iyang kaayo, malayang milalang sa tawo aron ipaambit kaniya ang Iyang kaugalingong bulahang kinabuhi.

    Tungod niini, sa tanang panahon ug sa tanang dapit, giduol sa Dios ang tawo ngadto Kaniya. Gitawag Niya ang tawo sa pagpangita Kaniya, sa pag-ila Kaniya, ug sa paghigugma Kaniya sa tibuok niyang kusog.

    Gitawag Niya ang tanang tawo, nga nagkatag ug nabahin tungod sa sala, ngadto sa panaghiusa sa Iyang pamilya, ang Simbahan.

    Aron matuman kini, sa dihang miabot na ang kahupnganan sa panahon, gipadala sa Dios ang Iyang Anak isip Manunubos ug Manluluwas.

    Diha sa Iyang Anak ug pinaagi Kaniya, giimbitar Niya ang mga tawo nga mahimong, diha sa Espiritu Santo, Iyang mga anak nga sinagop, ug busa mahimong mga manununod sa Iyang bulahang kinabuhi.

    2 Aron kini nga tawag madungog sa tibuok kalibotan, gipadala ni Cristo ang mga apostoles nga Iyang gipili, ug gisugo sila sa pagmantala sa Ebanghelyo:

    “Busa, panglakaw kamo ug himoa nga mga tinun-an ang tanang kanasoran, bautismohi sila sa ngalan sa Amahan ug sa Anak ug sa Espiritu Santo, ug tudlui sila sa pagtuman sa tanang akong gisugo kaninyo; ug ania karon, ako mag-uban kaninyo sa kanunay, hangtod sa kataposan sa kapanahonan.”[4]

    Gipalig-on niining misyon, ang mga apostoles “milakaw ug nanudlo bisan asa, samtang ang Ginoo nagbuhat uban kanila ug nagpamatuod sa mensahe pinaagi sa mga ilhanan nga mikuyog niini.”[5]

    3 Kadtong, uban sa tabang sa Dios, midawat sa tawag ni Cristo ug gawasnong mitubag niini, gidasig sa ilang gugma kang Cristo sa pagmantala sa Maayong Balita bisan asa sa kalibotan.

    Kining bililhong bahandi nga ilang nadawat gikan sa mga apostoles, matinud-anong gibantayan sa ilang mga manununod.

    Ang tanang matinud-anong sumusunod ni Cristo gitawag sa pagpasa niini gikan sa usa ka kaliwatan ngadto sa sunod, pinaagi sa:
    pagpamatood ug pag-angkon sa pagtoo,
    pagkinabuhi niini diha sa panag-ambitay isip managsoon,
    ug pagsaulog niini diha sa liturhiya ug pag-ampo.[6]

    [4] Mateo 28:19–20
    [5] Marcos 16:20
    [6] Itandi ang Buhat 2:42

0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.