I-click bisag asa aron moabli
  • Artikulo 1 — ANG PAGPADAYAG SA DIOS: MINUGBO
    UNANG BAHIN:
    ANG PAGPAMATOOD SA PAGTOO

    UNANG SEKSYON:
    “NAGATOO AKO” — “NAGATOO KAMI”

    KAPITULO II:
    ANG DIOS MODOOL ARON MAKIGKIGKITA SA TAWO

    Artikulo 1:
    ANG PAGPADAYAG SA DIOS


    MINUGBO

    68 Pinaagi sa gugma, ang Dios mipadayag sa Iyang kaugalingon ug mihatag sa Iyang kaugalingon ngadto sa tawo. Sa ingon, gihatag Niya ang kataposan ug hilabihan kaabundang tubag ngadto sa mga pangutana nga gipangutana sa tawo sa iyang kaugalingon mahitungod sa kahulogan ug katuyoan sa iyang kinabuhi.

    69 Gipadayag sa Dios ang Iyang kaugalingon ngadto sa tawo pinaagi sa anam-anam nga pagpahibalo sa Iyang kaugalingong misteryo pinaagi sa mga buhat ug mga pulong.

    70 Gawas pa sa pagpamatuod sa Iyang kaugalingon nga gihatag sa Dios pinaagi sa mga binuhat, gipadayag Niya ang Iyang kaugalingon ngadto sa atong unang mga ginikanan, nakigsulti Siya kanila ug, human sa pagkapukan, misaad Siya kanila sa kaluwasan (tan-awa ang Gen 3:15) ug nagtanyag kanila sa Iyang tipan.

    71 Ang Dios naghimo ug walay kataposang tipan uban kang Noe ug uban sa tanang buhing binuhat (tan-awa ang Gen 9:16). Kini magpabilin nga balido samtang naglungtad ang kalibotan.

    72 Gipili sa Dios si Abraham ug naghimo Siya ug tipan uban kaniya ug sa iyang mga kaliwat. Pinaagi niini nga tipan, giumol sa Dios ang Iyang katawhan ug gipadayag Niya kanila ang Iyang balaod pinaagi kang Moises. Pinaagi sa mga propeta, giandam Niya sila sa pagdawat sa kaluwasan nga gitagana alang sa tibuok katawhan.

    73 Gipadayag sa Dios ang Iyang kaugalingon sa hingpit pinaagi sa pagpadala sa Iyang kaugalingong Anak, nga diha Kaniya gitukod Niya ang Iyang walay kataposang tipan. Ang Anak mao ang kataposan ug hingpit nga Pulong sa Iyang Amahan; busa, wala nay dugang nga Rebelasyon human Kaniya.

0 comments:

Leave a Reply

Subscribe to: Post Comments (Atom)
Tulo ka hinungdanong pangutana nga dili nato matubag kon Biblia lamang ang atong saligan.

Una – Giunsa man nato paghibalo sa sakto nga ihap (canon) sa mga basahon sa Biblia? Sa wala pa himoa ang pagtapok sa mga basahon sa Bag-ong Tugon daghang mga basahon nga Kristohanon nga gipakaylap. Kinsa man ang nagpaila kanato sa 27 ka libro sa Bag-ong Tugon isip linamdagan? Walay lain kondili ang Simbahang Katoliko ubos sa paglamdag sa Espiritu Santo pinaagi sa Konsilyo sa Kartago sa tuig 397 AD human sa pag-aprobar sa Santo Papa mipakanaog sa mahukumon gayod ug alang sa tanang panahon kon unsang mga basahona ang maapil sa Biblia ug unsa ang dili. Ang unang mga sinulat dugay na nga nangahanaw. Ang ania kanato karon mao ang kopya sa kopya sa orihinal. Kinsa man ang nag-garantiya nga husto ug matinud-anon ang teksto sa kopya? Ang Simbahang Katoliko pinasikad sa iyang karaang Tradisyon, diha sa iyang panudlo ug sa iyang liturhiya masayod kon unsa ang matuod nga teksto ug unsa ang sayop.

Ikaduha - Giunsa man nato paghibalo nga sakto ang pagkahubad sanglit daghan kanato, ang atong gigamit nga Bibliang hubad “translation” gikan sa Hebreo, Griego, ug Aramaico? Aron pagpiho sa husto nga hubad sa atong kaugalingon kinahanglan pa nga magtuon kita sa orihinal nga pinulongan ug pipila man kanato ang makahimo niining malisod nga tahas? Sa makausa pa, kinahanglan nga mosandig kita sa autoridad sa Simbahan.

Ikatulo - Giunsa man nato pagsiguro nga husto ang atong pagsabot kun interpretasyon sa atong gibasa? Ang matag pastor nga tigtukod og bag-ong tinuhoan pulos gyod moangkon nga ang ilang sabot maoy husto apan wala silay panagkauyon kon unsa gyod ang gipasabot sa letra sa Kasulatan. Alang sa mga Katoliko ang dili masayop nga autoridad sa Simbahan nga tinukod ni Cristo ang maghatag kaniyag kasigurohan nga ang iyang nadawat mao ang lonsay nga pulong sa Dios nga walay sambog sa kasaypanan gumikan sa tawhanong panabot.
Ang Simbahan gihatagan ni Cristo sa bugtong katungod sa pagtudlo ug paghubad sa diosnong gipadayag nga nakarga sa Biblia nga mao ang diosnong gipadayag nga nasulat ug sa Tradisyon nga mao ang diosnong gipadayag nga wala na masulat ug nahipasa pinaagi sa binaba nga panudlo.

Ang Simbahan wala magkuha sa hingpit nga kasigurohan sa tanan nga gipadayag sa Dios gikan sa Biblia lamang kondili gikan sa duha ka tinubdan nga mao ang Biblia ug ang Tradisyon.

Ang Biblia ug ang Tradisyon angay nga hatagan sa samang pagtagad isip sudlanan sa pulong sa Dios. Ang katungod sa pagkadili-masayop sa pagpanudlo labot sa kinahanglan alang sa kaluwasan sa tawo wala isaad ni Cristo ngadto sa matag magbabasa sa Biblia kondili ngadto sa buhi nga autoridad sa Simbahan nga gitawag og “Magisterium” nga gilangkoban sa Sto. Papa ug sa tanang kaobispohan nga nahiusa sa Sto. Papa.
Ang Biblia naghisgot sa tulo ka matang sa tradisyon.

Una - sa mga Patriarca, “ug ang akong mga pulong nga gipasulti ko kaninyo, dili gayod mawala diha sa inyong baba ni sa baba sa inyong mga anak ug mga apo sukad karon ug hangtod sa kahangtoran” (Isa. 59:21).

Ikaduha - sa mga Apostoles, si San Pablo nag-awhag, “mga igsoon hupti ninyo nga malig-on ang mga pagtulon-an nga among gitudlo kaninyo pinaagi sa among mga sulat o sa among tradisyon” (2 Tes. 2:15) ug siya usab nagpahimangno, likayi ninyo kadtong dili modawat sa atong tradisyon” (2 Tes. 3:6).

Ikatulo - sa mga Judio, nga mao ang gisaway ni Cristo sa Mat. 15:2-6 tungod kay sila nagtudlo nga kon ang usa ka tawo may ikatabang unta sa iyang amahan o inahan, apan siya moingon, “iya kini sa Dios”, dili na kinahanglan nga tahoron niya ang iyang amahan.